Azərbaycan, Bakı, 14 iyul /Trend, müxbir Ü.İsmayılova/
2010-cu ilin yanvar-iyun ayları ərzində Azərbaycanın ümumi daxili məhsulu (ÜDM) ötən ilin müvafiq dövrü ilə müqayisədə 3,7 faiz və ya 561,4 milyon manat artıb. Bu barədə çərşənbə günü Azərbaycan Dövlət Statistika Komitəsindən bildiriblər. Cari qiymətlərdə ÜDM göstəricisi 19,7 milyard manat olub. Əhalinin payına düşən ÜDM-in həcmi 2210,6 manat (2751,5 dollar) olaraq 2,5 faiz artıb.
ÜDM-in 13,3 milyard manatı istehsalın, 5,1 milyard manatı (26,2 faiz) xidmətlər sahəsinin payına düşüb. Bu sahələrdə əlavə dəyər müvafiq olaraq 2,5 faiz və 5,4 faiz artıb.
Mal və idxalın xalis vergisi ÜDM-in 6,3 faizini təşkil edib.
İlin birinci yarısında sənaye sahəsində ÜDM-in 11,3 milyard manatı və ya 57,2 faiz əlavə dəyər hasil edilib. Kənd təsərrüfatında, meşə təsərrüfatında və balıqçılıqda 673,5 milyon manat əlavə dəyər hasil edilib ki, bu da ümumi ÜDM-in 3,4 faizini təşkil edir. Pərakəndə və topdansatışda, avtomobil və motosikllərin təmirində 1,3 milyard manat və ya 6,7 faiz, nəqliyyat və anbar təsərrüfatında 1,2 milyad manat və ya 6,3 faiz, mehmanxana biznesi və ümumi qida sahəsində 221,3 milyon manat və ya 1,1 faiz, informasiya və rabitədə 316,7 milyon manat və ya 1,6 faiz sosial və digər sahələrdə 2,1 milyard manat və ya 10,5 faiz əlavə dəyər hasil edilib.
Neft sektorunda əlavə dəyər istehsalı ötən ilin birinci yarısı ilə müqayisədə 2,4 faiz, qeyri-neft sektorunda isə 4,7 faiz artıb.
İyulun 14-nə olan rəsmi məzənnə 0,8037 AZN/USD təşkil edir.
