Azərbaycan, Bakı, 3 avqust /Trend, müxbir E.İsmayılov/
Azərbaycanın nəqliyyat naziri Ziya Məmmədov və Gürcüstanın regional və infrastruktur inkişafı naziri Ramiz Nikolaşvili çərşənbə günü Bakıda Bakı-Tbilisi-Qars layihəsi üzrə koordinasiya şurasının birgə doqquzuncu iclasının yekun protokolunu imzalayıblar. Bu barədə çərşənbə günü nazirlikdən bildiriblər.
İclas zamanı layihənin həyata keçirilməsinin amilləri, Gürcüstan ərazisində dəmir yolunun yenidən qurulması layihəsinin təsdiqi, Axalkalaki stansiyasının tikintisi layihəsinin həyata keçirilməsinin gedişi, Marabda-Karsaxi dəmir yolunun büdcəsinə dəyişikliklərin edilməsi və digər məsələlər müzakirə edilib.
Bakı-Tbilisi-Qars layihəsi çərçivəsində 76 km Türkiyə ərazisindən, 29 km isə Gürcüstan ərazisindən keçən yeni 105 kilometrlik dəmiryol magistralının tikintisi planlaşdırılır. Bundan əlavə, Gürcüstanda yükgötürmə qabiliyyətinin ildə 15 milyon tonadək artırılması üçün 183 kilometrlik Axalkalaki-Marabda-Tbilisi dəmiryol məntəqəsi bərpa ediləcək. Həmçinin, Axalkalakidə Gürcüstanda olan dəmir yolundan qatarların Avropaya keçməsi üçün məntəqənin inşa edilməsi planlaşdırılır.
