Gürcüstan, Tbilisi, 4 avqust /Trend, müxbir N.Kirsxaliya/
Gürcüstanın Türkiyə ilə sərhədində yerləşən Karsaxi kəndində dəmiryol stansiyası tikiləcək. Bu barədə Gürcüstan Regional və İnfrastruktur İnkişafı Nazirliyindən nazir Ramaz Nikolaişvilinin Bakıya edilən səfərinin yekunları üzrə məlumat veriblər.
O, səfəri çərçivəsində Azərbaycanın nəqliyyat naziri Ziya Məmmədov və Türkiyənin nəqliyyat və kommunikasiya naziri Bineli Yıldırımla birlikdə Bakı-Tbilisi-Qars marşrutu üzrə dəmiryol xəttinin açılması layihəsinin Koordinasiya Şurasının iclasında iştirak edib.
Bundan başqa, artıq tikinti işlərinin getdiyi Axalkalaki-Karsaxi keçidində Gürcüstan-Türkiyə sərhədi vasitəsilə üçkilometrlik tünel tikiləcək. Görüşdə gələcəkdə bu göstərici ildə 15 milyon tona çatdırılmaqla ilkin mərhələdə 5 milyon ton yükü buraxmağa qabil olacaq Axalkalaki dəmiryol qolunun tikintisi haqqında da söhbət gedib.
Tərəflər Bakı-Tbilisi-Qars layihəsi çərçivəsində cari məsələləri müzakirə ediblər və Tetri-Skaro-Salka və Salka-Axalkalaki dəmiryol qollarının tikinti layihəsi, yenidənqurulması və bərpası haqqında protokol imzalayıblar.
Koordinasiya Şurasının iclasında üç ölkə naziri qərara gəlib ki, tikinti şirkətləri qısa müddət ərzində iş qrafikini təqdim etməli olacaqlar. Bundan başqa, bir ay ərzində üç ölkənin texniki personalının nümayəndələrindən ibarət işçi qrup yaradılacaq. Onlar üç ay ərzində dəmir yolu magistralının fasiləsiz istismarı haqqında təkliflər təqdim etməlidirlər.
Bakı-Tbilisi-Qars layihəsi çərçivəsində əsas işlər 2011-ci ilin sonunda başa çatacaq, 2012-ci ildə isə dəmir yolu magistralı tam işləyəcək.
