Azərbaycan, Bakı, 17 avqust /Trend, müxbir T.Cəfərov/
2010-cu ilin dörd ay ərzində (İranda il martın 21-də başa çatır) Astara gömrük məntəqəsi vasitəsilə çamadan ticarətinin ümumi həcmi 13,8 milyon dollar təşkil edib. Bu barədə Astara gömrük məntəqəsinin rəisi Səid Hacıfiruzabadi deyib. Xəbəri İSNA informasiya agentliyi yayıb. Çamadan ticarəti ilə məşğul olanlar İrandan 13 053 ton mal daşıyıblar ki, bu da ötən ilin müvafiq dövrü ilə müqayisədə 85 faiz çoxdur.
Gömrük xidməti rəhbərinin sözlərinə görə, ixrac edilən mallar arasında, əsasən, ərzaq malları, yuyucu vasitələr, geyim, konservləşdirilmiş məhsullar, plastik qab-qaşıq, meyvə, tərəvəz, müxtəlif növ sərinləşdirici içki və gül olub.
Bu mallar İrandan Azərbaycanın Lənkəran və Astara rayonlarının sakinləri üçün ixrac edilib.
"İlk dörd ay ərzində 150 862 nəfər İranda səfərdə olub, 148 054 nəfər İrandan səfər edib", - Hacıfiruzabadi qeyd edib. Onun sözlərinə görə, bu rəqəm ötən illə müqayisədə 91 faiz artıb.