Azərbaycan, Bakı, 29 sentyabr /Trend, müxbir А.Axundov/
Azərbaycanda intellektual mülkiyyətin müdafiəsi üzrə Milli strategiya yaradılacaq. Bu barədə çərşənbə günü jurnalistlərə Azərbaycan Standartlaşdırma, Metrologiya və Patent üzrə Dövlət Komitəsinin sədri Ramiz Həsənov deyib.
"Cenevrədə Ümumdünya İntellektual Mülkiyyət Təşkilatının (WIPO) direktoru ilə görüş zamanı WIPO-un əməkdaşları ilə bu sahədə Azərbaycan Milli strategiyasının yaradılması barədə razılığa gəlmişik", - Həsənov deyib.
Onun sözlərinə görə, WIPO mütəxəssisləri 21-22 oktyabrda Azərbaycana gələcəklər.
Bundan əvvəl Trend-ə Azərbaycan Müəllif Hüquqları Agentliyinin sədri Kamran İmanovun bildirdiyi kimi, Azərbaycan Parlamentinin payız sessiyasında "İntellektual mülkiyyət hüququnun təmin olunması və piratçılıqla mübarizə haqqında" qanun layihəsinə baxılması gözlənilir.
"İntellektual mülkiyyət hüququnun təminatı və piratçılıqla mübarizə haqqında" qanun intellektual mülkiyyət sahiblərinin hüquqlarının müdafiəsini təmin etmək və onların maraqlarının müdafiəsi və hüquq pozuntularını aradan qaldırmaqla bağlı inzibati və məhkəmə prosedurlarını müəyyən etmək məsələlərini nizamlamağa yönəldilib.
Qanunun üçüncü fəsili piratçılıqla mübarizəyə aiddir. Bu fəsildə əsərlər, fonoqram və digər intellektual mülkiyyət obyektlərinin rəqəmsal kodlaşdırılması ilə bağlı konkret normalar göstərilib. Qanun informasiya texnologiyalarından qanunsuz istifadəni də aradan qaldıracaq.
Qanunun normalarına müvafiq olaraq, məhkəmə ticari şəbəkələrdə pirat nümunələr və saxta malların satılması faktlarını aradn qaldırmaq haqqında qərar qəbul edə bilər.
Bununla əlaqədar mövcud qanunvericilik şərtlərinə zidd olmamaq şərtilə, məhkəmə kompensasiya ödəmədən ticari şəbəkələrdə saxta məhsulları satışdan çıxara, həmçinin qanunvericiliyə zidd malların istehsalında istifadə olunan avadanlıq və materialları məhv edə bilər.
