Azərbaycan, Bakı, 10 dekabr /Trend, müxbir N.İsmayılova/
Azərbaycanda 2010-cu il dekabrın 1-dən buğda idxalının əlavə dəyər vergisindən (ƏDV) azad edilməsi hələ onun idxal həcminin artmasına təsir etməyib. Bu barədə cümə günü Dövlət Gömrük Komitəsinin sədri Aydın Əliyev məlumat verib.
"Azərbaycana buğda əvvəllər olduğu kimi idxal olunur. Ölkəyə doqquz gün ərzində 53 min ton gətirilib. Biz vaxtında qəbul edilən ƏDV-nin ləğv edilməsi haqda qərarı dəstəkləyirik. Çünki hazırda dünya bazarlarında dənli bitkilərin qiymətlərinin kəskin artımı müşahidə olunur", - DGK rəhbəri bildirib.
Azərbaycan 2011-ci il avqustun 1-dək buğda və un idxalçılarını ƏDV-nin ödənişindən azad edib.
Azərbaycanın Dövlət Statistika Komitəsinin məlumatına görə, noyabrın 1-nə Azərbaycanda qarğıdalı da daxil olmaqla, dənli bitkilərin istehsalı ötən illə müqayisədə 987,8 min ton və ya 33 faiz azalaraq 1999 min ton təşkil edib. Bu həcmin 1863,6 min tonu və ya 93,2 faizi buğdanın, 135,4 min tonu və ya 6,8 faizi qarğıdalının payına düşür. Ötən illə müqayisədə bir hektarda buğdanın orta məhsuldarlığı 26,5 sentner /hektara qarşı 20,7-yədək azalıb. Yazda ölkə ərazisində müşahidə olunan leysan yağışları dənli bitkilərin istehsalına mənfi təsir göstərib.
2010-cu ildə Azərbaycanda təxminən iki milyon ton buğda toplanacaq ki, bunun 1,3 milyon tonu ərzaq buğdasının payına düşür. Ölkədə ərzaq buğdasına tələbatın 1,5 milyon ton təşkil etdiyi nəzərə alınarsa, çatışmayan həcmlərin yerinin, o cümlədən idxal hesabına doldurulması planlaşdırılır.