Azərbaycan, Bakı, 22 dekabr /Trend, müxbir N.İsmayılova/
2006-cı ildə Azərbaycan Mərkəzi Bankının kart ödənişləri üzrə prosessinq mərkəzini alan "Milli Kart" MMC buraxılan kartların ümumi sayını 2011-ci ildə demək olar ki, 250 min ədədə çatdırmaq niyyətindədir. Bu barədə çərşənbə günü MMC-nin icraçı direktoru Cəlal Orucov bildirib.
"Bu göstəriciyə nail olmaq həm bazarın stimullaşdırılması və müştəri bazasının genişləndirilməsi yolu ilə, həm də yeni bankların "Milli Kart" sisteminə cəlb edilməsi sayəsində həyata keçiriləcək", - Orucov deyib.
Bu günədək mərkəz tərəfindən 170 mindən çox kart buraxılıb.
"Milli Kart" sistemində 12 bank xidmət göstərir. Bu günədək dörd bank (DəmirBank, Unibank, Zamin Bank və Bank of Baku) öz kart bizneslərini digər prosessinq mərkəzi olan "AzəriCard"dan Milli Karta köçürüblər.
Avropa Yenidənqurma və İnkişaf Bankı mərkəzin kapitalında iştirak payı almaqla yanaşı, prosessinq mərkəzinə 250 min dollar məbləğində texniki yardım da göstərib.
MMC 2006-cı il iyulun 14-də ölkənin 18 bankı tərəfindən Azərbaycan Mərkəzi Bankının kart ödənişləri üzrə prosessinq mərkəzinin alınmasından sonra yaradılıb. Hazırda mərkəzin kapitalında bankların iştirakının minimum həcmi bir faiz, maksimum 10 faiz təşkil edir. Mərkəzin nizamnamə kapitalı 5 milyon manatdır.
Mərkəzin təsisçiləri bunlardır: Atabank, DəmirBank, AzərTürkBank, Bank of Baku, Azərbaycan Sənaye Bankı, Debütbank, Amrahbank, Xalq Bank, Kredo Bank, AccessBank, Parabank, Rabitəbank, Bank Respublika, Bank Standard, Texnikabank, TuranBank, Unibank, Zamin Bank və AYİB.
Dekabrın 22-nə olan rəsmi məzənnə 0,7987 AZN/USD təşkil edir.