Azərbaycan, Bakı, 29 dekabr /Trend, müxbir A.Axundov/
Türkiyənin "Arvento" və Azərbaycan Dövlət Gömrük Komitəsinin (DGK) imzaladığı müqavilə çərçivəsində DGK yük maşınlarına nəzarət etmək üçün artıq 50 müşahidə qurğusu alıb. Bu barədə çərşənbə günü Trend-ə "Arvento"nun Azərbaycandakı rəsmi nümayəndəsi olan Azərbaycanın "Globtel Solutions" şirkətinin baş direktoru Telman Axundov deyib.
Onun sözlərinə görə, 2011-ci ilin birinci rübündə DGK üçün daha 200 qurğunun tədarükü gözlənilir.
"Müqavilə cari ilin sentyabrında sonradan uzadılma imkanı ilə iki il müddətinə imzalanıb. Müqavilənin ümumi dəyəri 100 min manatı ötür", - Axundov bildirib.
Axundovun sözlərinə görə, DGK "Arvento" şirkətinin məhsulunu Azərbaycan ərazisindən tranzitlə gəlib keçən yük avtomobillərinə nəzarət etmək üçün istifadə edəcək.
Onun sözlərinə görə, DGK ilə yanaşı, Azərbaycanda bu qurğuların sifarişçisi "AVIS Rent Car Company", "Akhundoff Networks Company", "Atronet", "Farmetic" MMC, "Santral Electirc" MMC, "AGBank" ASC, "Ozak Azerbaijan" MMC, "Set Auto Ltd", "Delta Telecom", "Smart Travel" MMC, "Remix" MMC, "Turkan Telecom" MMC və "AzAutoService" MMC şirkətləridir.
Türkiyənin "Arvento" şirkəti 2005-ci ildə yaradılıb və avtomobillərə nəzarət texnikasının istehsalında ixtisaslaşıb.
