Azərbaycan, Bakı, 14 mart /Trend/
Azərbaycan Dövlət Statistika Komitəsinin məlumatına görə, yanvar-fevralda Azərbaycanın nəqliyyat sektorunda 29,9 milyon ton müxtəlif yüklər daşınıb ki, bu da ötən ilin həmin dövründə olduğundan 5,6 faiz çoxdur.
Yanvar-fevralda daşınan yüklərin ümumi həcminin 70,8 faizi özəl sektorun payına düşür. Ötən il daşınan yüklərin ümumi həcminin 46,9 faizi avtomobil nəqliyyatı, 35,2 faizi boru kəmərləri, 11,2 faizi dəmiryol, 6,7 faizi isə dəniz nəqliyyatı ilə daşınıb.
Yanvar-fevralda 218,3 milyon sərnişin daşınıb ki, bu da ötən ilin analoji dövr göstəricisindən 6,1 faiz çoxdur. Sərnişinlərin əsas hissəsi (86,7 faiz) avtomobil nəqliyyatı və metro ilə (13 faiz) daşınıb.
Dəmiryol nəqliyyatı ilə 3,4 milyon ton müxtəlif yüklər daşınıb ki, bu da 2010-cu ilin analoji dövrünün göstəricisindən 4,7 faiz çoxdur.
Dəniz nəqliyyatı ilə 2 milyon ton müxtəlif yüklər daşınıb. Bu, ötən ilin eyni dövrünün göstəricisindən 3,3 faiz çoxdur. Daşınan yüklərin bütün həcmi beynəlxalq əməliyyatların payına düşür. Azərbaycan limanlarında emal olunmuş yüklərin həcmi yanvar-fevralda 2 milyon ton təşkil edib ki, bu da ötən ilin eyni dövründəkindən 36,1 faiz çoxdur.
Avtomobil nəqliyyatı ilə 14 milyon ton yük daşınıb. Bu, ötən ilin yanvar-fevral ayındakından 6 faiz çoxdur. Sərnişindaşımanın həcmi 189,2 milyon nəfər (artım 7,7 faiz) təşkil edib. Sərnişinlərin 96,7 faizi avtobuslarla, 3,3 faizi isə minik avtomobilləri ilə daşınıb.
Metropolitenlə sərnişindaşımanın həcmi 28,3 milyon nəfər təşkil edərək 2,3 faiz azalıb.
Yanvar-fevralda hava nəqliyyatı ilə 166,6 min sərnişin daşınıb. Daşımaların həcminin 2 faizi özəl sektorun payına düşüb.
Yanvarda Avrasiya nəqliyyat dəhlizi ilə Azərbaycan ərazisindən 4,6 milyon ton yük daşınıb ki, bu da 2010-cu ilin yanvar göstəricisindən 12,1 faiz çoxdur. Yanvarda dəhliz çərçivəsində 20 milyon nəfər daşınıb. Bu, ötən ilin yanvarında olduğundan 7 faiz çoxdur.
