Azərbaycan, Bakı, 28 mart /Trend, müxbir N.İsmayılova/
Dünya Bankı (DB) və Azərbaycan hökuməti ölkənin uzunmüddətli iqtisadi inkişafı üzrə cari ilin payızında ikinci forumun keçirilməsinə hazırlıq işləri görürlər. Bu barədə bazar ertəsi Trend-ə bankın Bakı nümayəndəliyindən deyiblər.
"Hazırda təxminən yayda başa çatacaq forumun mövzusunun seçilməsi, iştirakçıların dairəsi üzrə hazırlıq işləri aparılır", - nümayəndəlikdən bildiriblər.
Nümayəndəlikdən dediklərinə görə, forumun işində iştiraka dünya şöhrətli ekspertlər və DB-nin ali rəhbərliyi cəlb ediləcək.
Azərbaycanın uzunmüddətli iqtisadi inkişafına dair 2009-cu il oktyabrın 21-də keçirilən birinci forumun yekunları üzrə gələcək inkişaf məqsədilə ölkə iqtisadiyyatının şaxələndirilməsini, eləcə də irəliləyiş və nəticələrin qiymətləndirilməsi üçün yeni forumun keçirilməsini nəzərdə tutan fəaliyyət planının hazırlanması ilə bağlı razılıq əldə olunub. Forum Azərbaycan hökuməti və DB tərəfindən Bakıda təşkil olunmuşdu və bankın sərəncamçı direktoru Nqozi Okonco-İvealanın iştirakı ilə keçib.
Martda Vaşinqtonda DB-nin ABŞ-dakı ofisində Azərbaycan günləri keçirilib. Tədbir çərçivəsində Azərbaycan Mərkəzi Bankının rəhbəri Elman Rüstəmov DB prezidenti Robert Zelliklə görüşdə bildirib ki, belə tədbir əməkdaşlığı keyfiyyətcə yeni səviyyəyə yüksəltməyə imkan verəcək. Azərbaycan DB-nin ikinci iqtisadi forumunun işində iştirakda maraqlıdır. Bununla əlaqədar Vaşinqtonda müvafiq müzakirələr aparılıb.
Azərbaycan 1992-ci ildən DB ilə əməkdaşlıq edir və əməkdaşlıq çərçivəsində bank hazırda 43 layihənin maliyyələşdirilməsinə 2,9 milyard dollar ayırıb, bu isə Türkiyə və Qazaxıstandan sonra ölkəni portfelin həcminə görə üçüncü yerə qoyur.