Azərbaycan, Bakı, 3 may /Trend, müxbir N.İsmayılova/
Azərbaycan Beynəlxalq Bankı (ABB) BƏƏ-dəki nümayəndəliyini bank filialına çevirmək fikrindədir. Bu barədə çərşənbə axşamı ABB idarə heyəti sədrinin birinci müavini Emil Mustafayev Bakıda keçirilən Azərbaycan və BƏƏ arasında iqtisadi, ticarət və texniki əməkdaşlıq üzrə hökumətlərarası komissiyanın üçüncü iclasında bildirib.
"Bankımızın niyyəti BƏƏ-dəki nümayəndəliyin filiala çevrilməsidir ki, bu da ölkələr arasında investisiya imkanlarının genişlənməsinə yardım edər. Filial statusunun verilməsi ABB-yə bank əməliyyatlarının keçirilməsinə başlamağa imkan verir ki, bu da ölkələr arsında əlaqələrin inkişafına təkan verəcək", - Mustafayev bildirib.
Azərbaycan Beynəlxalq Bankı BƏƏ-də Dubay azad iqtisadi ticarət zonasında deyil, ümumi bazarda öz nümayəndəliyini açan ilk xarici banklardan biridir.
ABB-nin Londondakı (2002-ci ildən fəaliyyət göstərir) və Frankfurt-Mayndakı (2005-ci ildən) iki ofisinə 2008-ci ilin əvvəllərində Lüksemburqdakı ofis əlavə olunub. 2008-ci il iyulun 31-dən isə ABB MDB-dəki Azərbaycan bankları arasında Nyu-Yorkda ofis açmaq üçün ABŞ Federal Ehtiyatlar Sisteminin Direktorlar Şurasının icazəsini alan ilk bankdır.
Hazırda ABB Qətərdəki beynəlxalq maliyyə zonasında törəmə bankın açılması üzrə hazırlıq işləri aparır.
Qətərdəki törəmə bank ABB maliyyə qrupunun üçüncü törəmə bankı olacaq. Birinci bank olan "ABB-Moskva" öz fəaliyyətinə 2002-ci ildə Rusiyada başlayıb. Bu gün o artıq Moskvada, Sankt-Peterburqda və Yekaterinburqda 12 ofis və filialı ilə mötəbər maliyyə institutudur. 2006-cı ilin noyabrında ABB Azərbaycanın hüdudlarından kənarda özünün ikinci törəmə bankı olan "ABB-Gürcüstan"ı təsis edib.
ABB 1992-ci ildə Xarici İqtisad Bankının Azərbaycan şöbəsinin varisi kimi yaradılıb. ABB ölkənin bank sektorunda hakim mövqe tutur. Bankın nizamnamə kapitalında dövlətin payı 50,2 faiz təşkil edir, payın yerdə qalanı özəl hüquqi və fiziki şəxslər arasında bölüşdürülüb.