Azərbaycan, Bakı, 18 iyul /Trend, müxbir İ.Xəlilova/
Azərbaycanın strateji valyuta ehtiyatlarının idarə olunması mexanizminin təkmilləşdirilməsi onların gəlirlilik səviyyəsinin artırılmasını təmin edəcək. Bu barədə bazar ertəsi Trend-ə ölkənin Mərkəzi Bankından (AMB) məlumat verilib.
Bu tədbirlər 2011-ci il iyunun 28-də Azərbaycan Prezidenti İlham Əliyevin təsdiqlədiyi 2008-2015-ci illərdə yoxsulluğun azaldılması və davamlı inkişaf üzrə dövlət proqramının həyata keçirilməsi üzrə qəbul edilən 2011-2015-ci illər fəaliyyət proqramında nəzərdə tutulub.
"Bu istiqamətdə investisiya aktivlərinin şaxələndirilməsi, investisiya prosesinin hər bir mərhələsində qabaqcıl metodların tətbiqi, xaricdə idarəetmənin genişləndirilməsi vasitəsilə ehtiyatların idarə olunması effektivliyinin optimallaşdırılması nəzərdə tutulur", - Mərkəzi Bankdan deyiblər.
2011-ci il iyulun 1-nə olan vəziyyətə görə, strateji valyuta ehtiyatlarının həcmi 37,5 milyard dollara bərabər olub ki, bu vəsaitlərin 19 faizi (6718 milyon dollar) Mərkəzi Bankın vəsaitləridir. Əsas hissə - 10 002,8 million dollar Dövlət Neft Fondunun aktivləri, yerdə qalan hissə isə hökumətin (Maliyyə Nazirliyinin) depozitləridir.
"Ölkənin strateji valyuta ehtiyatları Azərbaycanın iqtisadi təhlükəsizliyini xarakterizə edən vacib göstərici, eləcə də sosial-iqtisadi inkişaf məqsədlərinə nail olmaq üçün əhəmiyyətli maliyyə mənbəyidir, - AMB-dən bildiriblər. - Eləcə də bu ehtiyatların xarici aktikvlərdə idarə olunması ölkəyə iri həcmdə gəlirlərin daxil olmasına yardım edir".