Azərbaycan, Bakı, 5 sentyabr /Trend, müxbir N.İsmayılova/
Asiya İnkişaf Bankının (AİB) Direktorlar Şurası Azərbaycandakı yol layihələri üzrə (Road Network Development Program) multitranş paketi (Multitranche Financing Facility - MFF) çərçivəsində üçüncü və dördüncü tranşların təsdiqlənəcəyi tarixi müəyyən edib. Bu barədə bazar ertəsi AİB-in yaydığı məlumatda deyilir.
200 milyon dollar məbləğində olan üçüncü tranşın təsdiqlənməsi məsələsinə 28 sentyabr 2011-ci il, 44,6 milyon dollarlıq dördüncü tranşa isə 10 noyabr 2012-ci ildə baxılacaq.
Üçüncü tranş çərçivəsində ayrılan vəsait dördzolaqlı Masallı-Astara magistralının B və С sektorlarının tikintisinin maliyyələşdirilməsinə yönəldiləcək.
AİB-in avtomobil yollarının tikintisinə 2007-ci ilin avqustunda təsdiqlənmiş 500 milyon dollar məbləğində birinci multitranş paketindən artıq 255,4 milyon dollar ayrılıb.
200 milyon dollar məbləğində olan birinci tranş Masallı-Astara avtomobil yolunun tikintisinə, ikincisi isə (55,4 milyon dollar) Gəncə dairəvi yolunun yenidən qurulmasına ayrılıb.
Azərbaycan 1999-cu ildən AİB-in üzvüdür. 2010-cu ilin əvvəlinə bankın ölkə üzrə kredit portfeli 680 milyon dollar təşkil edib. Əməkdaşlıq dövründə AİB Azərbaycan hökumətinə və yerli şirkətlərə ümumi məbləği 13,122 milyon dollar həcmində qrantlar da ayırıb.
AİB 1966-cı ildə yaradılıb və 67 üzvü var. Bankın mənzil-qərargahı Manilada (Filippin) yerləşir. Azərbaycan AİB üzvlüyünə 22 dekabr 1999-cu ildə qəbul edilib və ölkənin bankın kapitalındakı iştirak payı 0,5 faizdir.
AİB-in aparıcı səhmdarları Yaponiya və ABŞ (ümumi səhmdar kapitalının 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və başqalarıdır.
