Azərbaycan, Bakı, 24 yanvar /Trend, müxbir N.İsmayılova/
Su istifadəçiləri assosiasiyalarının inkişafının dəstəklənməsi layihəsinin (WUAP) işə salınması məqsədilə Dünya Bankının (DB) layihə qrupunun rəhbəri Devid Meyerbaxın başçılıq etdiyi DB-nin missiyası Azərbaycana səfər edəcək. Bu barədə çərşənbə axşamı Trend-ə bankın Bakı ofisindən məlumat veriblər.
"Missiya Bakıda yanvarın 28-dən fevralın 3-nə qədər olacaq. Səfər icmal xarakteri daşıyır və əsas məqsədi layihənin həyata keçirilməsinə hazırlıqdır", - DB-dən bildiriblər.
Azərbaycan hökuməti və DB 2011-ci ilin oktyabrında WUAP layihəsinin həyata keçirilməsinə 80 milyon dollar ayrılması haqqında kredit sazişi imzalayıblar.
Ayrılan vəsaitin 76,80 milyon dolları Beynəxalq İnkişaf Assosiasiyası (МАР), 3,20 milyon dolları isə Beynəlxalq Yenidənqurma və İnkişaf Bankı (BYİB) xətti ilə təqdim edilib. Azərbaycan hökuməti layihənin reallaşdırılmasına 34,30 milyon dollar ayırıb. Beləliklə, layihənin ümumi dəyəri 114,30 milyon dollar təşkil edir.
Gözlənilir ki, layihə Azərbaycanın 27 əyalətində yerləşən 760 000 xırda fermer təsərrüfatlarının məhsuldarlığını artıracaq ki, bu da süni suvarma və drenaj şəbəkələrinin yenidən qurulmasına və DB-nin maliyyə dəstəyi ilə müəyyən potensialın yaradılmasına kömək edir.
WUAP suvarma sistemlərinin idarə edilməsinə cavabdeh olan su istifadəçiləri assosiasiyalarının (SİA) potensialının möhkəmlənməsinə istiqamətlənib. Layihə təxminən 900 min hektarda 379 assosiasiyanın öyrədilməsi və dəstəklənməsini təmin edəcək.
Layihə çərçivəsində təxminən 3 min kilometrlik suvarma və drenaj kanallarının və hidrotexniki qurğuların bərpası da maliyyələşdiriləcək ki, bu da 85,5 min hektarda 34 SİA üçün üstünlük yaradacaq.
DB 1992-ci ildən - əməkdaşlığa başladığı andan Azərbaycana 43 layihənin reallaşdırılması üçün 2,9 milyard dollara yaxın məbləğdə maliyyə vəsaiti verib.