Azərbaycan, Bakı, 25 yanvar /Trend müxbir A. Axundov/
Azərbaycan Standartlaşdırma, Metrologiya və Patent üzrə Dövlət Komitəsi Sumqayıt, Xırdalan, Gəncə və Şəkinin baş planları üzərində işləri davam etdirir. Bu işlərin cari ildə başa çatdırılması planlaşdırılır. Bu barədə çərşənbə günü Trend-ə Dövlət Komitəsinin sədr müavini Dövlətxan Dövlətxanov deyib.
"Hazırda bu baş planların hissələrinin hazırlanması, yerli hakimiyyətlə konsepsiyanın razılaşdırılması aparılır", - Dövlətxanov vurğulayıb.
Onun sözlərinə görə, Dövlət Komitəsi Maliyyə Nazirliyi və digər dövlət strukturları ilə baş planları 2012-ci ildə hazırlanacaq şəhərlərin əlavə siyahısı üzərində danışıqlar aparır.
"Biz hazırda gələn həftənin sonuna qədər seçəcəyimiz beş-altı şəhərdən ibarət siyahını razılaşdırırıq" , - Dövlətxanov bildirib.
Komitə sədrinin müavini Dövlətxan Dövlətxanovun əvvəl Trend-ə dediyinə görə, Dövlət Komitəsi ölkənin beş iqtisadi rayonunun inkişaf planlarının hazırlanması üzrə iş aparır.
"Bu, Gəncə-Qazax, Quba-Xaçmaz, Şəki-Zaqatala, Lənkəran və Aran iqtisadi rayonlarıdır. Biz onların inkişaf planlarının hazırlanması üzrə işləri gələn il başa çatdırmağı planlaşdırırıq. Razılaşdırma məsələlərini proqnozlaşdırmaq çətindir, lakin ümumilikdə 2013-cü ildə bütün bu planlar qəbul ediləcək. 2012-ci ildə biz bu istiqamətdə işləri davam etdirəcəyik, həmçinin yeni regionlar üzrə işlərin aparılması üçün tender prosesinə başlayacağıq. Bu regional inkişaf planları faktiki olaraq, yaxın 20 il ərzində regionların inkişafının strateji planlarıdır", - Dövlətxanov deyib.
Dövlət Şəhərsalma və Arxitektura Komitəsinin sədri Abbas Ələsgərovun əvvəl dediyinə görə, Azərbaycanda təxminən 50 şəhərin baş planı hazırlanmalıdır.
Onun sözlərinə görə, Dövlət Komitəsinin şifarişi ilə hazırda 21 rayon mərkəzinin baş planları üzərində iş başa çatdırılıb.
