Azərbaycan, Bakı, 25 fevral /Trend, müxbir A.Axundov/
2011-ci ildə Bakının daşınmaz əmlak bazarının sahələri (ilkin və təkrar bazarlar, torpaq bazarı, özəl evlər, qeyri-yaşayış obyektlər) üzrə fəallığın artımı müşahidə edilib. Trend-in məlumatına görə, bu barədə şənbə günü Azərbaycan Mərkəzi Bankının 2011-ci ilin yekunlarına əsasən pul siyasəti üzrə hesabatında qeyd edilir.
"Ötən il təkrar mənzil bazarında qiymətlər 8,4 faiz, ilkin mənzil bazarında isə 5,3 faiz artıb. 2008-ci ilin səviyyəsi ilə müqayisədə təkrar mənzil bazarında bir kvadratmetrin qiyməti 14,2 faiz, ilkin mənzil bazarında isə 23,5 faiz artıb. Eyni zamanda, yaşayış obyektləri üçün icarə haqqı 2,4 faiz, kommersiya obyektləri üçün isə 5,8 faiz azalıb" , - hesabatda deyilir.
Ümumilikdə 2011-ci ili daşınmaz əmlak bazarında qiymətlərin sabitləşməsi dövrü kimi səciyyələndirmək olar.
Mərkəzi Bankın 2011-ci ilin yekunlarına görə açıqladığı maliyyə sabitliyi üzrə hesabatına əsasən daşınmaz əmlakın ilkin və təkrar bazarlarında sövdələşmələr üzrə ötən il cüzi artım qeydə alınıb.
"Bu gün verilən bank kreditlərinin böyük hissəsi daşınmaz əmlakla təmin edilib. Bununla da daşınmaz əmlak bazarında sabitlik maliyyə sabitliyi baxımından müsbət amil kimi qiymətləndirilə bilər" , - hesabatda deyilir.
