Azərbaycan,Bakı, 2 mart /Trend, müxbir A.Axundov/
Azərbaycanda "Sığortanın icbari növləri haqqında" yeni qanunun tətbiqinə başlanandan, yəni 2011-ci il dekabrın 16-dan 2012-ci il martın 1-dək İcbari Sığorta Bürosunun informasiya sistemi vasitəsilə nəqliyyat vasitəsi sahiblərinin mülki məsuliyyətinin icbari sığortası (NVSMMİS) üzrə 67,7 mindən artıq müqavilə imzalanıb. Bu barədə cümə günü Trend-ə bürodan məlumat verilib.
"Bu müqavilələr üzrə sığorta haqlarının həcmi 5,3 milyon manat təşkil edir", - bürodan deyiblər.
Həmin sığortaların 24 676-sı xaricdə qeydiyyata alınan və Azərbaycana tranzit məqsədilə gətirilən avtomobillərə aiddir və onlar bir aylığa imzalanıb.
Bununla yanaşı, fevralda NVSMMİS üzrə 39 875 müqavilə imzalanıb ki, onların 12 968-i xaricdə qeydiyyata alınan və Azərbaycana tranzit məqsədilə gətirilən avtomobillərə aiddir.
"Fevralda bu növ üzrə polislərin sayı yanvarla müqayisədə 48 faiz, onlar üzrə yığımların həcmi isə 56 faiz artıb", - bürodan deyiblər.
Bu gün ölkəmizdə 1 milyon 49 mindən artıq nəqliyyat vasitəsi var. Тəkcə ötən il daha 73 337 avtomobil qeydiyyatdan keçib. Hazırda hər 100 ailəyə 42 avtomobil düşür.
Beləliklə, martın 1-nə ölkədə olan avtomobillərin 6,45 faizi yeni NVSMMİS üzrə sığortalanıb.
