Azərbaycan, Bakı, 4 iyul /Trend, müxbir A.Axundov/
Azərbaycan Maliyyə Nazirliyi yanında Dövlət Sığorta Nəzarəti Xidməti icbari sığortaya aid olan dövlət əmlakının siyahısı üzərində işi davam etdirir. Trend-in məlumatına görə, bu barədə çərşənbə günü jurnalistlərə Xidmətin rəhbəri Namiq Xəlilov bildirib.
"Hazırda siyahının hazırlanması prosesi gedir və müxtəlif yanaşmalar müzakirə olunur", - Xəlilov deyib.
Onun sözlərinə görə, dövlət əmlakının sığortası yalnız müqavilə ilə həyata keçirilməyəcək.
"Bununla yanaşı, tenderin elan edilməsi də nəzərdə tutulmur, çünki hbər bir dövlət qurumu özü sığortaçını müəyyən edəcək", - DSNX rəhbəri bildirib.
İcbari Sığorta Bürosuna daxil olan bütün şirkətlər Azərbaycanda dövlət əmlakının icbari sığortasında iştirak edəcəklər. Şirkətlərə sığorta ödənişləri dövlət müəssisələrinin özləri tərəfindən büdcə vəsaitləri hesabına həyata keçiriləcək.
