Azərbaycan, Bakı, 5 iyul /Trend, müxbir A.Axundov/
Azərbaycanın yeganə təkrar sığorta şirkəti AzRe 2012-ci ildə mükafatların həcmini 10-15 faiz artırmağı planlaşdırır. Bu barədə cümə axşamı Trend-ə şirkətin idarə heyətinin sədri Vüsal Abbasov bildirib.
"2012-ci ildə 30 milyon manata yaxın vəsait toplamağı planlaşdırırıq", - Abbasov qeyd edib.
Onun sözlərinə görə, hazırda şirkət postsovet məkanı (əsasən, Rusiya və Gürcüstanda), Şərqi Avropa, Yaxın Şərq, Cənub-Şərqi Asiya, Latın Amerikası və Şimal Afrika ölkələrində riskləri qəbul edir.
Xaricdəki layihələrin payına şirkət portfelinin təqribən 10 faizi düşür.
"Bundan başqa, yerli bazarda şirkətimiz vasitəsilə risklərin təkrar sığortası üzrə iş tendensiyası artır. İndi bizim riskləri 15 milyon manatdan yuxarı səviyyədə saxlamaq imkanımız var ki, bu da bazar üçün olduqca yüksək göstəricidir. Aktivlərimiz 81 milyon dolları ötür. Şirkətimiz aktivlərin həcmi və nizamnamə kapitalı (40 milyon manat) üzrə postsovet məkanında ən böyüyüdür", - Abbasov deyib.
