Azərbaycan, Bakı, 23 avqust / Trend, müxbir İ.Xəlilova /
Beynəlxaql Valyuta Fondu (BVF) Azərbaycan hökuməti ilə məsləhətləşmələr çərçivəsində Yaxın Şərq və Mərkəzi Asiya üzrə Departamentinin müşaviri Raca əl-Marzoqini (Raja Al Marzouqi) ölkədəki missiyasının yeni rəhbəri təyin edib. Bu barədə cümə axşamı Trend-ə BVF-nin Bakı ofisinin rəhbəri Aygün Qədirli məlumat verib.
Ötən ildən bu səlahiyyətləri Nadim İlahi icra edirdi. İndi o, Avropa Departamentində şöbə rəisinin müavini vəzifəsinə keçirilib.
"Əl-Marzoqinin Azərbaycana ilk səfəri bu ilin yazında BVF missiyasının tərkibində fondun müşaviri qismində baş tutub. Onun missiyanın yeni rəhbəri kimi ölkəyə ilk səfəri isə noyabrda olacaq", - Qədirli bildirib.
Onun sözlərinə görə, əl-Marzoqi neft iqtisadiyyatına malik ölkələrdə böyük iş təcrübəsinə malikdir. O, BVF-da 2012-ci ilin fevralından çalışır. Buna qədər əl-Marzoqi Səudiyyə Ərəbistanı hökumətində, Səudiyyə Ərəbistanı və Bəhreynin özəl sektorunda çalışıb, eyni zamanda akademik fəaliyyətlə məşğul olub.
BVF-nin Azərbaycanda daimi nümayəndəliyi 1993-cü ildən fəaliyyət göstərir, lakin hökumətlə əməkdaşlığa 1992-ci ildən başlanılıb. Bu gün BVF-nin Bakı ofisi Mərkəzi Asiya və Qafqazdakı regional nümayəndəlik tərəfindən idarə olunur.
