Azərbaycan, Bakı, 26 sentyabr /Trend, müxbir R.Hafizoğlu/
Türkiyə parlamenti xarici vətəndaşların bu ölkədə mülk almasına imkan verən yeni qanunu qəbul etdikdən sonra ən çox satın alma Azərbaycan vətəndaşları tərəfindən İstanbul, Ankara və İzmir şəhərlərində olub. Bu barədə çərşənbə günü Trend-ə Türkiyənin Torpaq Kadastrı və Alqı-Satqı Dövlət Orqanındakı mənbə bildirib.
"Qanun qəbul ediləndən (2012-ci ilin iyulunda) bəri Azərbaycan vətəndaşları tərəfindən Türkiyədə mülk alınmasına böyük marağın olması müşahidə edilir. Azərbaycanlılar daha çox İstanbul, Ankara və İzmir şəhələrində mülk alırlar", - mənbə qeyd edib.
Türkiyənin Torpaq Kadastrı və Alqı-Satqı Dövlət Orqanının baş direktoru Mehmet Fatih Gürbüzün sözlərinə görə, digər tərəfdən, xarici vətəndaşların mülk alması prosesi ötən aydan başladığına görə ölkələr üzrə dəqiq statistika yoxdur.
Onun sözlərinə görə, mülkün satın alınması üzrə MDB ölkələri arasında Rusiya vətəndaşları liderlik edir. Buna səbəb Rusiya vətəndaşlarının daha əvvəl də Türkiyədə mülk əldə etmək imkanlarının olmasıdır. Türkiyə vətəndaşları da Rusiyada oxşar hüquqa malikdirlər.
"Rusiyalılar, əsasən, Alanya əyalətində mülk əldə edirlər, çünki bura kurort zonasıdır və onlardan bəziləri burada işləyir və ya biznesləri var", - Gürbüz vurğulayıb.