Azərbaycan, Bakı, 19 oktyabr /Trend, müxbir C.Nəsibova/
Avstriya və Azərbaycan arasında ikitərəfli əmtəə dövriyyəsinin həcmi artım tempinə malikdir ki, bu da ölkələr arasında əməkdaşlıqda vacib rol oynayır. Trend-in məlumatına görə, bu barədə cümə günü jurnalistlərə Avstriyanın Azərbaycandakı səfiri xanım Silviya Mayer-Kaybiç deyib.
"Ötən il ərzində ikitərəfli əmtəə dövriyyəsinin ümumi həcmi təqribən 150 milyon avro təşkil edib. İldən-ilə ticarət dövriyyəsinin artım tendensiyası vacib faktdır. 2012-ci ilin birinci yarısının yekunları üzrə ixrac-idxal əməliyyatlarının ümumi həcmi təqribən 60 milyon avro təşkil edib", - səfir qeyd edib.
Onun sözlərinə görə, Avstriyadan Azərbaycana əsasən texniki avadanlıqlar ixrac edilir, əks istiqamətdə isə neft tədarük edilir.
"Azərbaycan gələcəkdə Avstriyaya neft məhsulları, o cümlədən qida məhsulları - meyvə-tərəvəz məhsulları və s. ixrac etmək üçün geniş imkanlara malikdir", - Mayer-Kaybiç bildirib.