Azərbaycan, Bakı, 22 oktyabr/Trend, müxbir A. Axundov/
Kənd Təsərrüfatı Nazirliyi yanında Dövlət Baytarlıq Xidməti oktyabrın 24-26-da qeyd olunacaq Qurban bayramı ilə əlaqədar gücləndirilmiş iş rejiminə keçir. Bu barədə bazar ertəsi Trend-ə Dövlət Baytarlıq Xidmətinin mətbuat katibi Yolçu Xanvəli deyib.
"Xidmətin rəhbərliyi tərəfindən artıq müvafiq sərəncam imzalanıb", - Xanvəli qeyd edib.
Onun sözlərinə görə, Bakıya gedən əsas yollarda paytaxta aparılan iribuynuzlu mal-qaranı yoxlayacaq postlar quraşdırılıb.
"Bakıda gücləndirilmiş baytarlıq xidməti mal-qaranın kəsimi və satışı yerlərinin yaxınlığında yerləşən 25 məntəqədə həyata keçiriləcək", - Xanvəli vurğulayıb.
Onun sözlərinə görə, bundan başqa, Dövlət Baytarlıq Xidməti bayram günlərində Bakı və regionlarda mal-qaranın kəsimi və ətin satışının müəyyən edilməmiş yerdə həyata keçirilməsinin qarşısını almaq üçün tədbirlər görəcək.
Xanvəlinin sözlərinə görə, paytaxta artıq xeyli sayda iribuynuzlu mal-qaranı gətirilməsi başlayıb və müvafiq olaraq Dövlət Baytarlıq Xidməti bu prosesə nəzarət edir.
"Xəstə mal-qaranın gətirilməsi və ya xəstə heyvan ətinin satışı ilə bağlı faktlar hələlik qeydə alınmayıb", - o deyib.