Azərbaycan, Bakı, 21 noyabr /Trend, müxbir C.Nəsibova/
Azərbaycan Rusiya Federasiyasının (RF) 21 subyekti ilə iqtisadi əlaqələr qurub. Trend-in məlumatına görə, bu barədə çərşənbə günü jurnalistlərə Rusiyanın Azərbaycandakı ticarət nümayəndəsi Yuri Şedrin deyib.
"Bu il RF subyektlərinin rəhbərlərinin başçılıq etdiyi nümayəndə heyətləri Bakıya gəliblər. Onlar arasında Volqoqrad vilayəti, Çeçenistan və Qaraçay-Çərkəz respublikaları var ki, bu da Azərbaycanın RF-nin regionları ilə ticari-iqtisadi əlaqələrinin inkişafından xəbər verir", - Şedrin bildirib.
Onun sözlərinə görə, 2013-cü ildə Azərbaycan və RF-nin Kemerov vilayəti, Krasnodar diyarı, Volqoqrad vilayəti, Tambov vilayəti və Başqırdıstan Respublikası arasında ticari-iqtisadi və humanitar sahələrdə əməkdaşlıq haqqında sazişin imzalanacağı gözlənilir.
