Azərbaycan, Bakı, 21 yanvar /Trend, müxbir İ.Xəlilova/
Azərbaycan hökuməti ölkədə su təchizatı və kanalizasiya sistemlərinin yaxşılaşdırılması ilə bağlı birinci layihə çərçivəsində əlavə maliyyə vəsaiti almaq üçün Dünya Bankına (DB) müraciət etmək niyyətindədir.
"Azərsu" ASC-dən bazar ertəsi Trend-ə bildiriblər ki, fevralın ortalarınadək əlavə maliyyələşdirməyə dair tələbatı müəyyənləşdirmək məqsədilə layihənin qiymətləndirilməsinin yekunlaşdırılması planlaşdırılır.
Layihə Şamaxı, Qəbələ, Saatlı və Sabirabad rayonlarında su təchizatı və kanalizasiya sistemlərinin tam bərpa edilməsini əhatə edir.
"Əlavə maliyyə vəsaiti çirkab suların axıdılması üçün qurğunun təmirinə və Kür sutəmizləyici qurğusundan boru kəmərinin tikintisinə tələb olunur ki, bu da Qəbələ, Saatlı və Sabirabad rayonlarını içməli su ilə təmin etməyə imkan verəcək", - ASC-dən qeyd ediblər.
Qeyd edək ki, DB birinci layihə çərçivəsində 230 milyon dollar ayırıb, layihənin ümumi dəyəri isə 310 milyon dollardır. Hökumətin layihəyə ayırdığı maliyyə vəsaiti isə 80 milyon dollardır.