Azərbaycan, Bakı, 1 may /Trend, müxbir İ.Xəlilova/
Dünya Bankı (DB) və Azərbaycan hökuməti məişət tullantılarının idarə edilməsi layihəsinin (Integrated Solid Waste Management Project) əlavə maliyyələşdirilməsi məsələsi üzrə rəsmi danışıqlara başlayıblar. Bu barədə çərşənbə günü Trend-ə DB-nin Bakı nümayəndəliyindən bildiriblər.
"DB əlavə maliyyələşdirmə çərçivəsində Beynəlxalq Yenidənqurma və İnkişaf Bankının (DB-nin qrupuna daxildir) kredit resursundan 47,1 milyon dollar ayırmağı planlaşdırır, ölkə hökumətinin payı isə təqribən 8 milyon dollar təşkil edəcək" , - nümayəndəlikdən deyiblər.
Danışıqları bu həftənin sonunadək başa çatdırmaq planlaşdırılır və yekun olaraq protokol imzalanacaq. Protokol bankın Direktorlar Şurasına təqdim ediləcək. Direktorlar Şurasında kreditin təsdiqi mayın 30-na təyin edilib.