Azərbaycan, Bakı, 20 avqust /Trend, müxbir A.Axundov/
Azərbaycanda "Yaşıl kart" nəqliyyat vasitələrinin sahiblərinin vətəndaş məsuliyyəti sığortası beynəlxalq sisteminin funksiyalarını İcbarı Sığorta Bürosu (İSB) həyata keçirəcək. Bu barədə bürodan Trend-ə daxil olan məlumatda bildirilir
Bürodan bildirilib: "İSB Maliyyə Nazirliyi ilə birlikdə 2012-ci ilin əvvəllərindən başlayaraq "Yaşıl kart" sisteminə qoşulmaq üçün sistemin idarəedici təşkilatı olan İSB Şurası ilə danışıqlar aparır. Eyni dövrdə tərəfimizdən sistemin xüsusiyyətləri, iş prinsipləri, sistemə qoşulma ilə bağlı müəyyən edilmiş şərt və tələblərin ətraflı araşdırılması, həmin şərt və tələblərin ilkin olaraq yerinə yetirilməsinin təmin edilməsi istiqamətində xeyli iş görülüb".
Paralel olaraq, bu sahədə beynəlxalq praktikanın araşdırılması və öyrənilməsi məqsədilə sistemə üzv olan bir sıra xarici ölkə bürolarının (Türkiyə, Rusiya, Ukrayna, Belarus, İsveç və s.) iş təcrübələri ətraflı öyrənilmiş, həmin bürolarla yüksəksəviyyəli işgüzar əlaqələr qurulub.
Daha əvvəl bürodan bildirilib ki, Azərbaycan iki il ərzində - 2014-2015-ci illərdə "Yaşıl kart"a qoşula biləcək.