Azərbaycan, Bakı, 22 may /Trend, müxbir E.Əliyev/
Azərbaycanda qızıl istehsalçısı "Anglo Asian Mining PLC" şirkəti (AAM) Azərbaycan Beynəlxalq Bankından (ABB) 1,5 milyon dollar məbləğində kredit cəlb edib. Trend xəbər verir ki, bu barədə şirkətin cümə axşamı yaydığı məlumatda deyilir.
Məlumatda qeyd olunur ki, illik 12 faiz dərəcə ilə altı ay müddətinə verilən kredit şirkətin inkişafına yönəldiləcək.
"Anglo Asian Mining PLC" artıq ABB-dən 11,6 milyon dollar məbləğində aktiv kredit, eləcə də Amsterdam Ticarət Bankı (37 milyon dollar) və "Atlas Copco" şirkətindən (1,7 milyon dollar) borc alıb.
Qeyd edək ki, 2013-cü ildə şirkət 46 076 unsiya qızıl satıb, 2012-ci ildə isə satışın həcmi 42 743 unsiya təşkil edib.
