Azərbaycan, Bakı, 9 iyun /Trend, müxbir E.Əliyev/
2014-cü il mayın 1-nə olan vəziyyətə görə, ölkə banklarının aktivləri 22 milyard manat təşkil edib. Bu rəqəm 2013-cü ilin aprel ayının yekunu üzrə 17,78 milyard manat olub.
Trend Azərbaycan Mərkəzi Bankının statistik hesabatına istinadən məlumat verir ki, il ərzində bankların aktivləri 23,8 faiz artıb.
Bank sektoru aktivlərinin əsasını (67,8 faiz) müştərilərə verilən 14,92 milyard manat dəyərində kreditlər (il ərzində 25,5 faiz artım), investisiyalar (xüsusi çəkisi 8,82 faiz və il ərzində 21,25 faiz artımla 1,94 milyard manat) və müxbir hesablarındakı vəsaitlər (1,53 milyard manat) təşkil edib.
Maliyyə sektoruna verilən kredit və depozitlər aprelin yekunu üzrə 1,07 milyard manat olub.
Passivlər strukturunda əsas payı (43,38 faiz) ötən ilin analoji dövrü ilə müqayisədə 13,5 faiz artan depozitlər (2014-cü il mayın 1-nə 9,55 milyard manat) təşkil edir.
Maliyyə sektorundan alınan kredit və depozitlər 34,3 faiz artaraq 7,32 milyard manat təşkil edib.
Azərbaycanda 44 bank fəaliyyət göstərir.
