Azərbaycan, Qəbələ, 24 iyun /Trend, müxbir Zülfiyyə Qurbanova/
Xarici iştiraklı banklar Azərbaycanın bütün bank sisteminin aktivlərinin 54 faizinə nəzarət edir. Trend-in məlumatına görə, bunu Azərbaycan Mərkəzi Bankının (AMB) baş direktoru Rəşad Orucov Qəbələdə V Azərbaycan-Rusiya regionlararası forumu çərçivəsində keçirilən "Rusiya-Azərbaycan banklararası əməkdaşlığının inkişafı" adlı "dəyirmi masa"da deyib.
Onun sözlərinə görə, ölkədə xarici iştiraklı bankların sayı 22-dir: "Onların bank sektorunun kapital bazasında payı 67 faizə çatır. 14 belə bankda xarici kapitalın payı 50 faizi ötür".
R.Orucov qeyd edib ki, ölkənin ənənəvi bank sektoru xarici iştirak üçün açıqdır: "Azərbaycan belə normativ maneələrin olmadığı azsaylı ölkələrdən biridir və bir daha qeyd edim ki, ölkənin bank bazarı xarici kapital üçün tamamilə açıqdır".