Azərbaycan, Bakı, 23 avqust/Trend/
Şərq Tərəfdaşlığı ölkələri Ərazi Əməkdaşlıq Proqramı (EaPTC) üzrə Azərbaycan-Gürcüstan işçi qrupunun ikinci iclası sentyabr ayında Gəncədə keçiriləcək. Bunu şənbə günü Trend-ə EaPTC-dən deyiblər.
İşçi qrupunun birinci iclası ötən ilin sonunda Telavidə keçirilib.
Məlumatda qeyd edilir ki, iştirakçılar Azərbaycan-Gürcüstan ərazi əməkdaşlığının prioritetlərini ilkin olaraq razılaşdırıblar.
Layihə çərçivəsində hər iki ölkənin sərhədyanı rayonlarından olan sahibkarlar, hakimiyyət orqanları və ictimai təşkilatlar cəlb ediləcək. Proqramda Azərbaycanı Şəki-Zaqatala və Gəncə-Qazax iqtisadi rayonları təmsil edəcəklər. Gürcüstan tərəfindən isə proqrama Kvemo-Kartli və Kaxeti regionları daxil edilib. İlkin hesablamalara əsasən, qrantların həcmi 20-250 min avro arasında dəyişəcək.
Layihənin dəyəri 12,5 milyon avrodur.