Azərbaycan, Bakı, 4 sentyabr /Trend, müxbir Zülfiyyə Qurbanova/
2014-cü il avqustun 1-nə olan vəziyyətə görə, ölkə banklarının aktivləri 23,29 milyard manat təşkil edib. Bu rəqəm 2013-cü il iyulun yekunu üzrə 18,69 milyard manat olub. Bu barədə Trend Azərbaycan Mərkəzi Bankının statistik hesabatına istinadən məlumat verir.
AMB-nin məlumatına görə, il ərzində bankların aktivləri 24,6 faiz artıb.
Bank sektoru aktivlərinin əsasını (67,5 faiz) müştərilərə verilən 15,72 milyard manat dəyərində kreditlər (il ərzində 21,4 faiz artım), investisiyalar (8,52 faizlik xüsusi çəki ilə 1,98 milyard manat və il ərzində 23 faiz artım) və müxbir hesablarındakı vəsaitlər (1,74 milyard manat) təşkil edib.
Maliyyə sektoruna verilən kreditlər və depozitlər cari il iyunun yekunu üzrə 1,11 milyard manat olub.
Passivlər strukturunda əsas payı (43,1 faiz) 2013-cü ilin analoji dövrü ilə müqayisədə 18,3 faiz artan depozitlər (2014-cü il avqustun 1-nə 10,04 milyard manat) təşkil edir.
Maliyyə sektorundan alınan kreditlər və depozitlər 30,7 faiz artaraq 7,96 milyard manat təşkil edib.
2014-cü ilin ikinci rübünün yekunları üzrə Azərbaycanda 44 bank fəaliyyət göstərir: 43 kommersiya və bir dövlət bankı. Xarici kapitallı bankların sayı 22 ədəddir. Onlardan yeddisində xarici kapitalın xüsusi çəkisi 50 faizdən 100 faizədək, 13 bankda isə 50 faizədək təşkil edir. Həmçinin ölkədə xarici bankların daha iki filialı fəaliyyət göstərir.
