Daşkəsən. Taleh Mürsəqulov - Trend:
Azərbaycanda “Çovdar” qızıl yatağının şimal hissəsində 10 kvadrat kilometr ərazidə geofiziki işlər başa çatıb.
Trend-in məlumatına görə, bunu “Azergold” QSC-nin İdarə heyəti sədrinin müavini Oqtay Məmmədov deyib.
O.Məmmədovun sözlərinə görə, hazırda əldə olunan məlumatların təhlili aparılır:
“Gələn il Kəpəz dağının ətəyində 11-12 kvadrat kilometr ərazidə geofiziki işlər aparılacaq. Növbəti mərhələ quyuların qazılması olacaq. Hazırda qazma işləri 3 istiqamətdə aparılır. İşlər iyul ayında başlayıb və ilin sonunadək başa çatacaq”.
O.Məmmədov əlavə edib ki, “Çovdar”ın yeraltı ehtiyatlarının təsdiq olunması üçün 32 quyu qazılıb:
“2019-cu ilin birinci rübündə layihənin texniki-iqtisadi əsaslandırılması başa çatacaq”.