Vergilər nazirliyi ölkədə maliyyə amnistiyasının elan olunmasının məqsədəuyğunluğunu öyrənmək məqsədilə ilkin araşdırmalara başlayıb. Bu barədə Trend ə vergilər nazirinin müavini Natiq Əmirov məlumat verib. Onun sözlərinə görə, əmlak və gəlirlərin qanuniləşdirilməsi rəsmi açıqlama sisteminə keçidlə əlaqədar atılacaq mühüm addımdır.
Lakin maliyyə amnistiyası ilə bağlı müvafiq normativ-hüquqi baza onun Azərbaycanda həyata keçirilməsi məqsədəuyğun olduğu təqdirdə işlənib hazırlanacaq.
Nazir müavininin qeyd etdiyi kimi, bu tədbirlər 2005-2007-ci illərdə Azərbaycanda vergi inzibatçılığının təkmilləşdirilməsi üzrə 2005-ci ildə təsdiqlənmiş dövlət proqramı çərçivəsində nəzərdə tutulub. Bununla yanaşı 2006-cı ildən başlayaraq korrupsiya ilə mübarizə üzrə dövlət proqramına əsasən, məmurların əmlakının rəsmən açıqlanması prosesi başlayır və artıq bəyannamə formaları Vergilər Nazirliyi tərəfindən Nazirlər Kabinetinin təsdiqinə verilib.
