Bu gün Azərbaycanın Texnika bankı və Kanadanın Toronto Daminion Bankı (TDB) arasında $4 mln məbləğində kredit xəttinin açılması haqqında müqavilənin imzalanması planlaşdırılır. Bu barədə Trend ə Texnikabankın idarə heyətinin sədri Samir Hüseynov məlumat verib. Müqavilənin bağlanması üçün TDB-nin Beynəlxalq Maliyyələşmə Departamentinin meneceri Suxa Koçabal Bakıdadır.
Kreditlər Texnikabankın törəmə şirkəti Texnika Leasinq üçün ABŞ-dan avadanlığın alınması məqsədilə US EximBankın zəmanəti ilə verilir. S.Hüseynov bildirib ki, şirkətdə beynəlxalq auditin aparılmaması ilə əlaqədar kredit ehtiyatları bank vasitəsilə cəlb olunur. Xaricdən vəsait cəlb etmənin üstünlüyü ondan ibarətdir ki, ehtiyatlar belə halda ucuz əldə olunur. Bu onunla izah olunur ki, Azərbaycan bankları ehtiyatları illik 12%-lə cəlb etdiyindən, bundan aşağı dərəcə isə kredit verə bilməz.
Kanada bankının şərtlərinə əsasən, kredit Libor+2%-lə (bu gün Libor 4,93% təşkil edir) cəlb olunur. Texnikabankın sədri bildirib ki, TDB adətən borc götürən bankın kapitalının 30%-i həcmində kredit ayırır. Buna görə kreditin məbləği $4 mln-dur.
Texnika Leasinq şirkəti 2004-cü ildə yaradılsa da, 2005-ci ilin ikinci yarısından fəaliyyət göstərir. Şirkətin lizinq portfeli $460 min təşkil edir və bu vəsaitə Hollandiyadan avadanlıq alınıb.
Şirkət Beynəlxalq Maliyyə Korporasiyasının Azərbaycanda lizinqin inkişafı üzrə proqramı çərçivəsində texniki yardım alır. Keçən il bank və BMK arasında əməkdaşlıq protokolu imzalanıb.