Barmek Azerbaijan İqtisadi İnkişaf Nazirliyinə müqavilənin birtərəfli qaydada pozulması barədə rəsmi xəbərdarlıq edib. Trend agentliyinin məlumatına əsasən, bugünkü brifinqdə iqtisadi inkişaf naziri Heydər Babayev deyib ki, şirkət İnvestisiyalar üzrə Vaşinqton Məhkəməsinə müraciət etdiyi barədə də xəbərdarlıq edib və iddianın surətini təqdim edib.
"Müqavilə Şərtlərinin İcrasının Təftişi üzrə Komissiya işini davam etdirir və biz şirkətin Azərbaycan elektrik şəbəkələrinə yatırılmış $291 mln. investisiyasının hökumət tərəfindən ödənilməsi tələbinə əsaslanmaq niyyətində deyilik. Hələ baxmaq lazımdır ki, kim kimə borcludur. Komissiyanın apardığı işin nəticələri əsasında hansı tərəfin pul ödəməli olacağı aydınlaşacaq" - deyə nazir vurğulayıb.
Onun sözlərinə görə, komissiyanın işi Barmek Azerbaijan şirkətinin qoyduğu investisiyaların və ziyanın həcmini müəyyənləşdirmək, istehlakçıların şikayətlərilə bağlı araşdırmalar aparmaqdır.
İqtisadi inkişaf nazirinin müavini, komissiyanın sədri Mikayil Cabbarovun sözlərinə görə, müqavilə şərtlərinin ən əsas pozuntularından biri Barmek Holding-ın Barmek Azerbaijan müəssisəsini yaradaraq Bakı və Sumqayit elektrik şəbəkələri üzrə aktivləri onun balansına keçirməsidir ki, bu da müqavilədə nəzərdə tutulmayıb. İlkin araşdırmalara görə, şirkət bəyan etdiyi həcmdən az investisiya yatırıb. Bundan əlavə, investisiya obyektinin qiyməti ilə real qiymət uyğun deiyl.
Onun fikrincə, Barmek Azerbaijan-ın müqaviləni pozmaq qərarının ən əsas səbəbi onun müqavilə öhdəliklərini yerinə yetirə bilməməsidir, çünki istehlakçılardan toplanan vəsaitlərin həcmi ilə elektrik enerjisinin alışına sərf olunan vəsait uyğun deyil.
Barmek Azerbaijan-ın əmlak və bank hesablarına həbs qoyulması barədə İqtisad Məhkəməsinin ilkin qərarında deyilir ki, həbs əmək haqlarının və kommunal xərclərin ödənilməsinə aid deyil. "10 min yeni manatdan yuxarı olan ödənişlər nazirliyin iczəsilə həyata keçirilə bilər. 10 min yeni manata qədər olan ödənişlər isə icazəsiz gerçəkləşdirilə bilər" - deyə nazir müavini vurğulayıb.