Sosial ipoteka təcrübəsinin öyrənilməsi üçün Azərbaycan İpoteka Fondunun mütəxəssilərinin MDB ölkələrinə səfəri davam edir. Azərbaycan Milli Bankının baş direktoru Rüfət Aslanlının Trend ə verdiyi məlumata əsasən, mütəxəssislər Qazaxıstandan sonra Kiyevə yola düşüb. Hazırda bir neçə Avropa ölkəsilə danışıqlar aparılır.
"Səfərin əsas məqsədi sosial ipoteka təcrübəsinin öyrənilməsidir, lakin Qazaxıstanda gördüyümüz nəticələr sosial ipotekanın özünəməxsus elementləri olduğunu göstərir və burada hər hansı bir dövlətin təcrübəsindən yararlanmaq çox çətindir. Qazaxıstanda tədbiq olunan üsul, statistik məlumatlara əsasən, gözlənilən nəticələri verib. Onlar 200 mindən çox sosial kredit verməyi ehtimal edirdilər, bu günə kimi isə 4 min verilib. Bu o deməkdir ki, sosial ipotekanın elementləri hazırlanarkən hər addımı nəzərə almaq lazımdır ki, sosial qrupların ümidləri doğrulsun" - deyə R.Aslanlı bildirib.
Bu səfərlər Nazirlər Kabinetinin tapşırığı ilə həyata keçirilir və bunun başa çatmasından sonra ipoteka kreditləşdirilməsi üzrə qaydaların təkrar nəzərdən keçirilməsi planlaşdırılır. Son varianta əsasən, ipoteka kreditinin ödənilməsi müddəti 25 ildir, annuitet məbləğ isə 50% azaldılıb. Əgər hazırda kreditin rəsmiləşdirilməsi zamanı gələcək mənzilin dəyərinin 30%-i həcmində vəsait ödəmək lazımdırsa, gənc ailələr üçün bu məbləğ iki dəfə az olacaq. Kredit üzrə faiz dəyişməyib və 12% səviyyəsindədir. Bundan əlavə, dövlətin ya ilkin ödənişin yarısını ya da kredit üzrə xidmət faizinin yarısını üzərinə götürəcəyi gözlənilir.
Gənclər Nazirliyinin ilkin hesablamalarına əsasən, respublikada mənzil şəraitinin yaxşılaşdırılmasına ehtiyacı olan 50 min gənc ailə var, Müdafiə Nazirliyinin məlumatlarına əsasən isə, hərbiçilər arasında bu rəqəm 25-30 min arasıdır.