Azərbaycanın İqtisadi İnkişaf Nazirliyi tərəfindən hazırlanmış 2007- ci il üçün makroiqtisadi göstəricilər üzrə proqnozların sonuncu variantına əsasən, artım tərəfinə dəyişiklər olub. Hökümətdən Trend ə verilən xəbərə görə, ölkə iqtisadiyyatının indiki artım templərini nəzərə alaraq, ÜDM-in artım dinamikası ilk variantda proqnozlaşdırılandan daha böyük templərlə davam edəcək.
2006-cı ildə gözlənilən 16,3 mlrd. manat əvəzinə 2007-ci ildə ÜDM-in istehsal həcmi ilkin olaraq 21,4 mlrd. manat səviyyəsində qoyulmuşdu. Lakin əsasında büdcə proqnozlarının hazırlandığı sonuncu variantda ÜDM-in istehsal həcmi 26,3% artım tempi ilə 22,2 mlrd. manat həcmində proqnozlaşdırılıb.
ÜDM-in artım templəri qeyri-dövlət sektorunun inkişafı ilə əlaqədardır. Proqnozlara görə, özəl sektorun ÜDM-də xüsusi çəkisi 79% təşkil edəcək. Bu göstərici 2006-cı ildə 77% səviyyəsində planlaşdırılır. 2007-ci ildə sənayedə real artım 41,8% həcmində (2006-cı ildə -50%) planlaşdırılır və 13,246 mlrd. manat, kənd təsərrüfatında 10% artımla 1,576 mlrd. manat (gələn il 9,5%) təşkil edəcək. Nəqliyyat sektorunda 2006-cı illə müqayisədə 20% artım gözlənilir və 0,958 mlrd. manat, tikinti sektorunda -1,387 mlrd. manat (8%), daxili ticarətdə - 1,272 mlrd. manat (14,3%) təşkil edəcək.
