Avqustun 30-dan başlayaraq Beynəlxalq Valyuta Fondu missiyasının Bakıya səfəri başlayıb. Missiyanın başçısı - Yaxın Şərq və Orta Asiya ölkələri ilə iş üzrə Departamentin direktor müavini Vitali Kramarenko isə Bakıya sabah gəlir. Bu barədə Trend ə BVF-nin Bakı nümayəndəliyindən məlumat verilib.
Avqustun 30-da Fondun ekspertləri Mayra Zermeno və Şuanq Dinq Maliyyə Nazirliyi və Dövlət Statistika Komitəsində görüşlər keçirib. Gün ərzində İqtisadi İnkişaf Nazirliyi və Milli Bankda görüşlərin keçirilməsi gözlənilir. V.Kramarenko işə sentyabrın 1-dən başlayacaq.
Missiyanın əsas məqsədi Azərbaycan hökuməti ilə 2006-cı ilin qalan dövrü üçün makroiqtisadi siyasəti müzakirə etməkdən, 2007-ci ilin dövlət büdcəsinin layihəsi və makroiqtisadi siyasətin əsas prinsipləri üzrə məsləhətləşmələr aparmaqdan ibarətdir.
BVF missiyasının sonuncu səfəri zamanı hökumət makroiqtisadi vəziyyətə nəzarətlə bağlı müntəzəm msələhətləşmələrin aparılmasında maraqlı olduğunu bildirmşdir. Bununla əlaqədar olaraq, fond ildə ən azı bir dəfə iri missiya çərçivəsində "BVF haqqında" Sazişin 4-cü bəndi üzrə icmallar aparmaq qərarına gəlib.
