Dövlət Gömrük Komitəsi (DGK) Azərbaycanın yeni gömrük məcəlləsini təqdim etməyi planlaşdırır. Bu barədə DGK sədri Aydın Əliyev Trend ə eksklüziv olaraq məlumat verib.
Onun sözlərinə görə, Azərbaycanın yeni gömrük məcəlləsinin ilkin variantı üzərində işlər artıq başa çatıb və komitənin bir sıra idarələri sənədlə tanış olduqdan sonra onun təqdimatı olacaq.
"Noyabrın 13-dən 15-dək məcəllə layihəsinin geniş təqdimatının keçirilməsi planlaşdırılır. Təqdimatın dəqiq tarixi sonradan dəqiqləşdiriləcək", - deyə A.Əliyev vurğulayıb.
Komitə sədri bildirib ki, məcəllənin təqdimatı çərçivəsində 1999-cu ildən həyata keçirilən gömrük xidmətinin müasirləşdirilməsi layihəsinin uzadılması haqqında BMT İnkişaf proqramı ilə sazişin imzalanması ehtimal olunur.
Xarici ekspertlərin fikrincə, yeni məcəllə Azərbaycanın Avropaya inteqrasiyasına xeyli təsir göstərəcək, gömrük prosedurlarının şəffaflığı və sadələşdirilməsini, ölkəyə xarici sərmayələrin cəlb olunmasının səmərəliliyini təmin edəcək.
Yeni məcəllə üzərində işlər Avropa Komissiyasının vəsaitləri hesabına maliyyələşdirilən və BMT İnkişaf proqramı ilə (UNDP) reallaşdırılan illik layihə çərçivəsində görülür. Layihənin dəyəri 900 min avrodur və onun əsas məqsədi qanunvericilik bazasının təkmilləşdirilməsində, onun dünya standartlarına, o cümlədən Avropa Birliyinin gömrük məcəlləsinə uyğunlaşdırılmasında DGK-ya yardımın göstərilməsi, DGK informasiya texnologiyalarının inkişaf strategiyasının təkmilləşdirilməsi və reallaşdırılmasıdır.
Azərbaycanın yeni gömrük məcəlləsinin 2007-ci ildə fəaliyyətə başlaması planlaşdırılır. Ölkədə ilk gömrük məcəlləsi 1997-ci ildə qəbul olunub.