Azərbaycanın aqrar sektorunda da yeni mərhələ başlayıb. Trend in məlumatına görə, ölkəmizin aqrar sektorunda baş verən prosesləri şərh edən Milli Məclisin İqtisadi siyəsət məsələləri daimi komissiyasının sədri, millət vəkili Ziyad Səmədzadə belə deyib.
"Artıq ölkədə torpaq islahatları başa çatıb və torpaq öz sahibinin ixtiyarındadır. Bununla belə, aqrar sahənin inkişafı üçün müəyyən tədbirlər görülməlidir. Cari ildə bu istiqamətdə müvafiq addımlar atılıb. Sahibkarlara maliyyə dəstəyi ildən ilə artır. Torpağın münbitliyini artırmaq qarşıda duran vəzifələrdən biridir", - deyə komissiya sədri qeyd edib.
Onun sözlərinə görə, Azərbaycan aqrar sahədə unikal imkanlara malik ölkə kimi tanınır. Ona görə də bu imkanlardan səmərəli istifadə olunmalıdır: "Dövlət başçısının apardığı siyasət nəticəsində aqrar sahənin inkişafı üçün güzəştli kreditlərin verilməsi, aqroservis xidmətinin yaxşılaşdırılması istiqamətində artıq ciddi addımlara start verilib. Şübhəsiz ki, gələcəkdə aqrar sahənin daha da inkişafı üçün ciddi tədbirlərin nəticələrini görəcəyik."
Z.Səmədzadə vurğulayıb ki, 2006-cı ilin ən böyük uğurlarından biri də odur ki, Azərbaycan tarixində indiyədək görünməmiş səviyyədə infrastruktur layihələri həyata keçirilib. O, bu istiqamətdə görülən işlər arasında nəqliyyat sisteminin dinamik inkişafını xüsusi qeyd edib: "Bununla bağlı nəqliyyat-ticarət əlaqələrinin də genişlənməsi imkanları artır."
Azərbaycanda qeyri neft sektorunun artım sürətinin ildən ilə yüksəldiyini deyən komissiya sədrinin fikrincə, bu sahənin tərkibində mütərəqqi sahələrin xüsusi çəkisi artmaqdadır: "Dövlət başçısı Sənaye və Energetika Nazirliyinə tapşırıb ki, ölkənin sənaye cəhətdən inkişaf proqramı hazırlasın. Qeyd edim ki, artıq Azərbaycanda irimiqyaslı sənaye layihələri həyata keçirilməkdədir."
Yeni iş yerlərinin 80 faizinin regionlarda açıldığını bildirən Z.Səmədzadə qeyd edib ki, bu ölkənin tarazlı şəkildə inkişaf etməsi baxımından vacib amildir.
