Azərbaycan, Bakı, 11 iyun / Trend , müxbir E.İsmayılov/ Azərbaycan Dövlət Neft Şirkətinin (ARDNŞ) Yataqların Modelləşdirlməsi Mərkəzi "Salyan Oil"şirkətinin operatoru olduğu "Kürsəngi" yatağının cənub hissəsinin modelləşdirlməsi üzrə işləri başa çatdırıb. Bu barədə çərşənbə günü mərkəzdən bildiriblər.
Modelləşdirmə Mərkəzi yataqda qazılacaq yeni quyuların yerlərinə dair proqnozlarını təqdim edib.
Müqavilə sahəsində ümumilikdə 80-dən çox quyu qazılıb. Yataq ehtiyatlarının yenidən qiymətləndirilməsi 18 mln. tona bərabər olan prqnozlar arasında cüzi fərqin olduğunu göstərib.
Cari ildə əməliyyat şirkəti altı istismar quyusu qazmaq niyyətindədir. Quyuların dərinliyi təxminən 3500-4000 metr təşkil edir. Bu il şirkətin büdcəsi 45,5 mln. dollar səviyyəsində müəyyən olunub.
Ötən il şirkət altı quyu qazıb (Biri 2006-cı ildən 2007-ci ilə keçid dövründə) ki, onlardan biri kəşfiyyat quyusudur. Ötən il "Salyan Oil"in büdcəsi 43 mln. dollar təşkil edib.
"Kürsəngi-Qarabağlı" yatağının işlənməsi üzrə müqavilənin fəaliyyət müddəti 25 ildir. Layihənin səhmdarları bunlardır: ARDNŞ - 50 faiz, iki Çin şirkəti - "China National Oil & Gas Exploration and Development Corp" (CNODC) və "CNPC" (Hong Kong) Ltd. (CNPCHK)- hər biri 25 faiz.
Məqalə müəllifi ilə əlaqə ünvanı: capital