Azərbaycan, Bakı, 25 noyabr/ Trend , müxbir E.İsmayılov/ Yaxın günlərdə ikibloklu "Ümid- 1" platformasının ikinci bloku "Ümid" qaz - kondensat dəniz yatağına göndəriləcək, - SOCAR şirkətində işlərə yaxın mənbə çərşənbə axşamı bildirib.
Hər iki blokun tikintisi Heydər Əliyev adına Dərin Özüllər Zavodunda həyata keçirilib. Zavoddan çərşənbə axşamı bildiriblər ki, ikinci blokun tikintisi üzrə işlər artıq başa çatıb. "Hazırda blok struktura göndərilməyə hazırdır. Hər şey hava şəraitindən asılıdır", - zavoddakı mənbə bildirib.
Qazmanı 2009 - cu ilin martında başlamaq planlaşdırılır, - SOCAR- dakı mənbə bildirib. Əvvəllər qazma 2008 - ci ilin sonuna planlaşdırılırdı. Mənbə, qazma işlərinin yubanmasının əsas səbəbi kimi, platformanın tikintisinin gecikməsini göstərib. Ümumilikdə platformadan beş quyu qazmaq planlaşdırılır.
Bu platformadan qazılacaq ilk quyudan güman edilən sutkalıq hasilat 750 min kubmetr qaz və 150 ton kondensat təşkil edəcək.
"Ümid- 1" dəniz platformasının istismarı SOCAR-a şəxsi vəsaitlər hesabına işlənilən yataqlardan qaz hasilatının artırlması üzrə proqramın reallaşdırılması çərçivəsində lazımdır. Proqrama əsasən, SOCAR-ın dövlətə verdiyi təbii qazın həcmi 8 mlrd. kubmetr təşkil etməlidir. Bu il SOCAR 8 mlrd. kubmetr qaz hasil etməyi planlaşdırır ki, bunun da 7 mlrd. kubmetri dövlətə təhvil veriləcək.
Tikilib başa çatdırılmamış "Çıraq- 6" platformasının bazasında tikilən "Ümid- 1" platforması proqram çərçivəsində ən iri obyektdir - onun hündürlüyü 72 m təşkil edəcək. Platforma "Bulla dəniz" dəniz yatağından 15 km məsafədə, suyun 58 m dərinliyində yerləşdiriləcək, - SOCAR- dan əvvəllər bildiriblər.
SOCAR-ın geoloqları "Ümid" dəniz yatağında güman edilən qaz ehtiyatlarını 200 -300 mlrd. kubmetr qiymətləndirirlər.
Müəlliflə əlaqə saxlamaq üçün elektron ünvan - [email protected]