Azərbaycan, Bakı, 10 fevral / Trend / SOCAR şirkətinin (Azərbaycan Dövlət Neft Şirkəti) "28 may" Neft-Qaz Çıxarma İdarəsi (NQÇİ) yüksək debitli üç yeni quyunun istismara verilməsi hesabına ilin əvvəlindən sutkalıq qaz hasilatını 500 min kubmetr artırıb. Bu barədə SOCAR-ın çərşənbə axşamı yayılan məlumatında bildirilir.
"Günəşli" (SOCAR-ın balansında ən iri yataq) yatağını istismar edən NQÇİ əvvəllər "Günəşli - 13" platformasında növbəti yüksəkdebitli quyunu istifadəyə verib. Quyunun dərinliyi 3900 metr təşkil edir. Onun sutkalıq debiti isə 200 min kubmetr qaz və 50 ton qazokondensata bərabərdir.
20 quyunun qazılması üçün nəzərdə tutulan "Günəşli-13" platforması 2004-cü ilin mayında istismara verilib. Dörd il ərzində platformada 12 quyu qazılıb və istismar fonduna təhvil verilib. Bu quyuların sutkalıq debiti 2,5 mln. kubmetr qaz, 660 ton neft və 300 ton qazokondensat təşkil edir.
"Günəşli" SOCAR-ın müstəqil şəkildə istismar etdiyi ən iri neft-qaz yatağıdır. SOCAR tərəfindən hasil edilən neftin ümumi həcminin 60 faizi, qazın isə 70 faizi onun payına düşür.
