Azərbaycan, Bakı, 5 iyul /Trend, müxbir E.İsmayılov/
Böyük Britaniyanın mexaniki xidmətlər sahəsində ixtisaslaşan "EnerMech" şirkəti BP Exploration (Xəzər dənizi) Ltd şirkəti ilə Azərbaycanda kran əməliyyatları, texniki xidmət və baxış xidmətlərinin göstərilməsi üzrə ümumi dəyəri 8,2 milyon funt (12 milyon dollar) olan müqavilə imzalayıb. Bu barədə "www.allmediascotland.com" internet saytında yerləşdirilmiş məlumatda deyilir.
Üçillik müqaviləyə Bakıdakı şelfdə kran işlərinin həyata keçirilməsi üçün əsas personalın verilməsi, qaldırıcı avadanlıqlar, mühəndis və texniki xidmətlər, ehtiyat hissələri, təmir, bərpa və təhsil xidmətləri daxildir.
İşlərin miqyası BP-nin "Çıraq", "Mərkəzi Azəri", "Qərbi Azəri", "Şərqi Azəri" və dərinsulu "Günəşli" yataqlarında, eləcə də "Şahdəniz" qaz yatağında çalışan 12 offşor pyedestal-kranı əhatə edir.
O cümlədən müqavilə çərçivəsində illik işlərə 60-a yaxın adamın, eləcə də ofşor, xüsusi ekipaj və ofis personalının cəlb ediləcəyi ehtimal olunur. Sövdələşmənin başlıca elementi "EnerMech" şirkətinin müqavilənin qüvvəyə mindiyi andan 30 ay ərzində mövqelərin əksəriyyətinə azərbaycanlı vətəndaşların işə qəbulu ilə bağlı üzərinə götürdüyü öhdəlikdir.