Azərbaycan, Bakı, 9 mart /Trend, müxbir E.İsmayılov/
2010-cu ildə ARDNŞ-nin ixrac etdiyi neftin dəyəri 1,23 milyard dollara yaxın olub ki, bu da 2009-cu ilin göstəricisindən 173,2 milyon dollar çoxdur. Bu barədə ölkə hökumətinin ötən ilin yekunları üzrə hesabatında deyilir.
Məlumata əsasən, ixrac edilmiş neftin dəyərinin artması onunla bağlı olub ki, 2010-cu ildə bir ton neftin orta ixrac qiyməti 547,7 dollar təşkil edib. Bu göstərici 2009-cu ildə 427,4 dollar olub.
2010-cu ildə ARDNŞ tərəfindən ümumilikdə 2,2 milyon ton neft ixrac edilib ki, bu da 2009-cu ilin göstəricisindən 225,4 min ton azdır.
Həmçinin, ötən il ARDNŞ təxminən 2,51 milyon ton neft məhsulu ixrac edib. Bu, 2009-cu ilin göstəricisindən 191,6 min ton çoxdur. Ötən il neft məhsulları 1,2 milyard dollardan çox məbləğdə ixrac edilib. Bu, ötən ilin göstəricisindən 208,6 milyon dollar çoxdur.
2010-cu ildə şirkət daxili bazarda dəyəri 1,4 milyard manat olan 3,24 milyon tondan çox neft məhsulu satıb. Ötən il neft məhsulları 2009-cu ildəkindən 200,4 min ton çox satılıb (109,2 milyon manatlıq artım).
2010-cu ildə ARDNŞ 12,4 milyard kubmetr qaz alıb. Bunun 7,2 milyardı şirkət tərəfindən, qalan 5,2 milyard isə "Azəri-Çıraq-Günəşli" və "Şahdəniz" yataqlarının işlənməsi layihələri çərçivəsində hasil edilib. ARDNŞ-nin əldə etdiyi qazın ümumi həcmindən 7 milyard kubmetr daxili bazara yönəldilib, 1,1 milyard kubmetri ixrac edilib (0,8 milyard kubmetr Rusiyaya, 0,3 milyard Gürcüstana ixrac edilib).
2010-cu ildə ümumilikdə ARDNŞ üzrə neft, qaz və qaz məhsullarının satışından daxilolmaların həcmi 4,25 milyard manat təşkil edib.
