Azərbaycan, Bakı, 17 may /Trend, müxbir E.İsmayılov/
Yanvar-mart aylarında Azərbaycanın dəniz yataqlar bloku "Azəri-Çıraq-Günəşli"dən (AÇG) neft hasilatı 54 hasilat quyusunda aparılıb. Bu barədə BP-nin birinci rübün yekunları üzrə rəsmi hesabatında deyilir. Ümumilikdə bu dövrdə AÇG-də 9,6 milyon ton (70,74 milyon barel) neft hasil edilib.
Layihənin operatoru qismində çıxış edən BP-nin hesabatında deyilir ki, "Çıraq" yatağında istismarda 10 quyu (6 neft hasil edən və 4 subasma quyusu) olub və bu dövrdə yataqda sutkalıq hasilat 81,8 min barelə yaxın təşkil edib.
Birinci rübdə "Mərkəzi Azəri" yatağında 18 quyu (12 neft hasil edən və 5 qaz basma quyusu və bir subasma )işləyib. Bu dövr ərzində bu yataqda orta sutkalıq hasilat 216 min barel olub.
"Qərbi Azəri" yatağında istismarda 19 quyu (14 neft hasil edən və 5 subasma quyusu) olub. Hesabat dövründə burada orta sutkalıq hasilat təxminən 2 2 5,3 min barel təşkil edib.
"Şərqi Azəri" yatağında 14 quyu istismar (10 neft hasil edən və 4 subasma quyusu) edilib. Yanvar-mart ərzində sutkalıq hasilat 130,7 min barel təşkil edib.
Dərin sularda yerləşən "Günəşli"də istismarda 21 quyu (12 neft hasil edən və 9 subasma quyusu) olub və sutkalıq hasilat 131,8 min barelə yaxın olub.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 34,1367 faiz iştirak payı), "ChevronTexaco" (10,2814 faiz), ARDNŞ (10 faiz), INPEX (10 faiz), "Statoyl" (8,5633 faiz), "ExxonMobil" (8,006 faiz), TPAO (6,75 faiz), "Devon Energy" (5,6262 faiz), "Itochu" (3,9205 faiz), "Delta Hess" (2,7213 faiz).
