Azərbaycan, Bakı, 1 oktyabr /Trend, müxbir E.İsmayılov/
"Caspian Geophysical" şirkəti gələn ilin əvvəlindən Xəzərin Azərbaycan sektorundakı "Ümid" qaz-kondensat yatağında və "Babək" perspektiv strukturunda üçölçülü geofiziki tədqiqatlar aparmağı planlaşdırır. Bu barədə şənbə günü Trend-ə neft-qaz sahəsindəki mənbə məlumat verib.
"Ümid" və "Babək" yataqlarında işlər gələn il yanvarın əvvəllərində başlaya bilər", - mənbə deyib.
Tədqiqat "Gilavar" geofizika gəmisi ilə aparılacaq.
ARDNŞ mütəxəssislərinin qiymətləndirmələrinə görə, "Ümid" yatağında ehtiyatların həcmi 200 milyard kubmetr qaz və 40 milyon ton qaz-kondensat təşkil edir.
Xəzərin Azərbaycan sektorundakı "Ümid" yatağı Bakının 75 kilometrliyində, qurudan 40 kilometr uzaqlıqda yerləşir. Burada 1953-cü ildə ilk dəfə geofiziki işlər aparılıb. Bu işlər 1972-ci ildə daha təkmilləşdirilmiş şəkildə yenidən həyata keçirilib. Daha sonralar, 1977-ci ildən 1992-ci ilədək doqquz quyu qazılsa da, onlardan heç biri nəticə verməyib.
"Babək" perspektiv strukturu "Ümid" yatağının yaxınlığında yerləşir. ARDNŞ bu strukturda işləri müstəqil şəkildə aparmağa hazırlaşdığını dəfələrlə bəyan edib.
ARDNŞ-nin geologiya, geofizika və yataqların işlənməsi üzrə birinci vitse-prezidenti Xoşbəxt Yusifzadənin əvvəllər dediyi kimi, ARDNŞ geoloqları "Babək" strukturunun mümkün ehtiyatlarını 400 milyard kubmetr qaz və 80 milyon ton qaz-kondensat qiymətləndirirlər. Lakin ehtiyatların dəqiq həcmi kəşfiyyat qazmasından sonra müəyyən olunacaq.
