Bakı. Trend:
Enerji daşıyıcılarının dünya qiymətləri 2026-cı ildə hasilat və daşınmada baş verən pozuntular səbəbindən əhəmiyyətli dərəcədə artacaq.
Trend xəbər verir ki, bu barədə Beynəlxalq Valyuta Fondunun (BVF) hesabatında qeyd olunur.
Proqnoza əsasən, enerji xammalı üzrə qiymətlər 2026-cı ildə 19% artacaq ki, bu da 2025-ci ilin oktyabr proqnozunda gözlənilən azalma ilə kəskin ziddiyyət təşkil edir. Neft qiymətlərinin 21,4% artacağı, neftin spot qiymətlərinin orta indeksinin isə əsasən Yaxın Şərqdə tədarükdə yaranan fasilələr səbəbindən bir barel üçün təxminən 82 dollar təşkil edəcəyi gözlənilir.
BVF-nin qiymətləndirməsinə görə, təbii qaz qiymətləri daha da əhəmiyyətli dərəcədə artacaq ki, bu da hasilatın bərpasının çətinliyi və neftlə müqayisədə ehtiyatların məhdud səviyyəsi ilə bağlıdır.
Əlverişsiz ssenariyə əsasən, neft qiymətləri 2026-cı ilin ikinci rübündən etibarən yanvar ayındakı baza səviyyəsi ilə müqayisədə 80% arta, daha sonra isə 2027-ci ildə baza səviyyəsindən təxminən 20% yüksək həddə enə bilər. Bu, 2026-cı ildə orta hesabla təxminən 100 dollar, 2027-ci ildə isə 75 dollar səviyyəsinə uyğun gəlir. Avropa və Asiyada qaz qiymətləri isə növbəti ildə qismən azalmadan əvvəl 160%-ə qədər sıçraya bilər.
Daha kəskin ssenariyə əsasən isə, neft qiymətləri 2026-cı ilin ikinci rübündən etibarən iki dəfə arta və 2027-ci ildə də yüksək səviyyədə qala bilər. Bu halda, 2026-cı ildə orta qiymət təxminən 110 dollar, 2027-ci ildə isə 125 dollar təşkil edə bilər. Bu ssenaridə Avropa və Asiyada qaz qiymətləri eyni dövrdə 200%-ə qədər arta bilər.