Gürcüstan, Tiflis / Trend müxbir N.Kirtsxalia/ Gürcüstan müvəqqəti olaraq Azərbaycana eletrik enerjisinin ixracını dayandırır. Trend ə Gürcüstanın Dövlət Elektrik Sistemindən verilən məlumata görə, bu Gürcüstanla Azərbaycanı birləşdirən "Qardabani - 500" yarımstansiyasında aparılan təmir işləri ilə əlaqədardır.
Avqustun 10-dan 31-nə qədər yüksək təzyiqli yarımstansiya olan "Qardabani - 500" stansiyasının 300 kilovoltluq ötürücü xəttində hava elektrik açarı digəri ilə əvəz olunacaq.
Həmçinin onun araşdırılması və əsaslı təmiri aparılacaq. Qeyd edək ki, elektrik açarı 40 ilə yaxındır ki, istismar olunur və bu vaxt ərzində dəyişdirilməyib.
Azərbaycana ötürülən elektrik enerjisinin bərpası təmir işlərinin bitməsindən sonra baş tutacaq.
